ខេត្តព្រះសីហនុ៖ មនុស្សប្រុសស្រីជនជាតិវៀតណាមសរុប ៦៣ នាក់ ត្រូវបានអាជ្ញាធរខេត្តព្រះសីហនុឃាត់ខ្លួន កាលពីថ្ងៃទី ១៥ ខែកក្កដា ឆ្នាំ ២០២៥ ពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា (Online Scams)។ ការឃាត់ខ្លួននេះធ្វើឡើងបន្ទាប់ពីកម្លាំងសមត្ថកិច្ចបានបើកប្រតិបត្តិការចុះបង្ក្រាបទីតាំងសង្ស័យចំនួន ៤ កន្លែងផ្សេងគ្នា។
គណៈបញ្ជាការឯកភាពខេត្តព្រះសីហនុ ដឹកនាំដោយលោក យូសុះ សូឡៃម៉ាន អភិបាលរងខេត្ត ដោយមានការសហការជាមួយសមត្ថកិច្ច និងអាជ្ញាធរពាក់ព័ន្ធ បានចុះឆ្មក់ត្រួតពិនិត្យទីតាំងទាំង ៤ នោះ ដែលរួមមានសណ្ឋាគារ ផ្ទះល្វែងជួល និងវីឡាជួល។
ក្នុងប្រតិបត្តិការនេះ សមត្ថកិច្ចបានរឹបអូសវត្ថុតាងសំខាន់ៗជាច្រើន រួមមាន៖
- លិខិតឆ្លងដែនសរុប ៣៤ ក្បាល
- កុំព្យូទ័រ ៥៤ គ្រឿង
- និងសម្ភារៈពាក់ព័ន្ធជាច្រើនទៀត
បច្ចុប្បន្ន ជនសង្ស័យទាំង ៦៣ នាក់ រួមទាំងវត្ថុតាងទាំងអស់ ត្រូវបានបញ្ជូនទៅស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធីតាមផ្លូវច្បាប់។
យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា
ការបង្ក្រាបនេះធ្វើឡើងស្របពេលដែលលោកនាយករដ្ឋមន្ត្រី ហ៊ុន ម៉ាណែត បានដាក់ចេញនូវយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យាទូទាំងប្រទេស។ យុទ្ធនាការនេះកើតឡើងបន្ទាប់ពីមានការកត់សម្គាល់ថា សកម្មភាពឆបោកតាមអនឡាញកំពុងបង្កការគំរាមកំហែងដល់សន្តិសុខក្នុងតំបន់ និងពិភពលោក។
លោកនាយករដ្ឋមន្ត្រីបានព្រមានថា មន្ត្រីណាដែលមិនអនុវត្តតាមបទបញ្ជានេះ នឹងត្រូវដក ឬប្ដូរមុខតំណែង។ យុទ្ធនាការនេះមានគោលបំណងបង្ការ ទប់ស្កាត់ និងប្រយុទ្ធប្រឆាំងការឆបោកតាមបច្ចេកវិទ្យា ដើម្បីថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។
ឆបោកតាមប្រព័ន្ធបច្ចេកវិទ្យា
ជនជាតិវៀតណាម៦៣នាក់ត្រូវបានឃាត់ខ្លួន.
